राजअहिरियाके बट्कोही

 राजअहिरियाके बट्कोही

पैहिले कौनो एकठो डेसमे राजा राल्ह । उ राजाके अनधन् श्रीसम्पत्ति, हाँथीघोडा, लाउलस्कर, गैयाभैसीनियाँ, छेग्रभेडी, जग्गा जिमिन सब पुगल रल्हिन। सन्तानके हिसाबम चारठो छावा रविन । चिजवस्तु सआर्से राजा अमनचयनतके जीवनयापन करतह। चार थो छावा मढ्ये बर्का छावक नाउं राजअहिरिया रहिन् । उ राजकुमार शिकार खेल्नाम बरा सौकिन रहित । कमशः दिन बिट्ती गैल । एक दिन उ राजकुमार बन्वाँ म सिकार खेल जैना विचार कर्ल । सिकार खेले जैइबेर कडाचिट मै मर हर जैम ट इ चिन्हाँ छोरके जाइटुँ कैह्क जिवनके चिन्ह पिपरा, बरगद, आम आमली लगाक जिवनके सहिदान धैक घोरुवाम सवार हुइथ ओ एकथो गीत गैथ। 

गित

वायु बहल बहपुरवैया रे, बहपुरवैया ।

बाँधल यंचला उडी फहराई हो मोरी राजा।

अहिरिया आवै न घरे, ॥१॥

चल्ते चल्ते कजरिक बन्वांम पुग्थ, वहाँसे फेन आगे जाके बैंरिक बन्वाँम पुग्थ, बैंरिक बन्वाँकेबादम और बन्वाँ नघती हैंसके के बन्वाँम पुग्थ, ओकरवादम एकदम घना छिर नैसेक्ना बिजा बनखनम पुग्जैठ । बिजा बनखनम क्षेत्रकबादम जब शिकार के लाग कौनो फेन चित्तर तथा जिन्वार नैमिल्य ओ बन्वाँ फेन अन्य घनके मार छिर नैसेक्नाके कारण खिसियाक घोर्वाहन चन्दनके रुखुवाम बाँध्क अप्न चाहीं चन्दनके रुखुवाम चिहुरजैथ। जब बनुवा चर पतहीं जरलागथ ओ बन्वाँके जिन्वाँर, पंक्षीलोग भाग लग्थ ओ सब भाग जैथ तर चिमता चाहीं हली भाग नै सेक्के ओस्त मुअ लग्ध त राजअहिरीयहन दया अइथिन ओ बहुत गहिरक सोंच्थकी है! भगवान बाघ, भालु, चित्तर, हाँथी, चिरैचुरुङ्गा, पाखपखीउरी त उरक भाग जैही तर चिम्ता त कहाँ भाग सेकहीं, मै बहुत बेकार काम करनु कैक पस्टईट ओ  उप्पर रुखुवामनसे गिट गैठ :

गीत

पाख पखीउरी सब उरी जैहीं रे, 

चिमतीके परल बरी दुःख हो मारी राजा, 

अहिरिया आवै न घरे ||२||  

अत्रा सोंचक गित गाक तर भुइयाँम हेर्थ त और ठाउँ जरक सब सफा होजाइथ पर एकथो छोटिमोटी ठाउँ नै जरथ त राजअहिरिया बहुत अचम्म पर्थ और सोच्थ की आगी लागलम अन्त सब जरजैना पर उ ठाउँ नै जरना का कारन हो कैक रुखुवामन से उतरके जैथ तौ एकथो तपस्वी रथी । राजअहिरिया ओहाँ जाक तपस्वीसे पुच्छथ की :

गिट 

का तै हुत्या दुत भूत रे, का तैं हुई जोगीनकै पुत,

विच जंगलमे लोदना पसारी हो, मोरी राजा अहिरिया आवे ना घरे ॥३॥

अत्रा गित गाक तपस्वीहन राजअहिरिया कहल की तै के हुई। अतना घना बनुवाँ ओहीम बाघ, भाल, हाँथी, गिदार जसीन हिंन्सक जन्वाँर रहल ठाउँ आपन जिउ जनके परवाह नै कैक अकेली इ घोर घना बनुवाँम का कारण तैं घोर तपस्या करत्या। का त्वार दुःख परल बा त, कहत  घरिम तपस्वी जन्नी काली कीः

गिट

ना मै हुईतु दुत भूत रे, ना मै हुई जोगीनकै पुत, 

एक पुता बिना मै बरी दुःखीके कारण बिच जंगलमे लोडना पसारी हो मोरी राजा, अहिरिया आवैं ना घरे ।।४।। 

अत्रा कहिक तपस्वी कहथी की अम्हिन मोर तपस्या पुरा हुइल नेर रह, तर तै तपस्या बिगार डेल्या । मोर तपस्या तैं काहे बिगार डेल्या, मोर तपस्या विना पुग्ल तै तपस्या बिगार डेले अब मोर काम बिगर गैल, कि मोर तपस्या पूरा कर, कि मोर काम बना, कि महि जन्नीके रुपम लेह परल। तपस्वी जन्नी अत्रा बात कहतम राजअहिरिया बहुत अप्थ्यारोम पर्ल ओ कहल की ना मै तोर तपस्या पूरा कर सेकम, ना मै तोही छावा देना काम कर सेकम, ना मै तोही जन्नीके रुपम बरन करसेकम। मोर घर जान्नी, लरका परका परली बात। जन्नी लरका परका रहतीम तोही कहाँ जन्नींक रुपम बर्न कर सेकम। राजअहिरियाके अत्रा बाट सुनक तपस्वी जन्नी कहल की इ बात बिरकुल नै बनी । मोर तपस्या काहे तै विगरले। अब बिचम आक मही तपस्या जोर नै मिली। कित पुनः मही तपस्या कर परी, जबकी मोर तपस्या ओरैनाही हिसाब रह, जौन दुःख कट्‌ना काट सेक्ल रिलहु। अब पुनः तपस्या करना कतना दुख हुइ पता बाट की नाई ? कि मह लेह परल, कि महि एकथो छावा देह परल, कि मोर तपस्या पूरा कर परल।

तपस्वी जन्नीक बाट सुन्क राजकुमार अहिरिया बरा कठिनम परगैल ओ दुबरा कहल की हे तपस्वी | मै एक राजकुमार हुई तु, राजपुत्र हुईनाके नातेसे मै अनर्थ कर नै मिल्ना हो। जन्नी परली परली दोसर जनी लेहम त मोर बाबा दाई, भैयन का कहहीं, उसिम मै बरका राजकुमार हुइतु, बर मनै मै असिक करलागम तौ भैयन का करहीं और का कहहिं । कृपया! मही इ पता नै रह की तै यहाँ तपस्या तपस्या करते कहिक। मै कुछ नै जन्धु तोर बिषयम। राजकुमारके असीन बात सुन्क तपस्वी जन्नी कहल की असीन बात हो कलसे मोर तपस्या बिगरलक तोही बरा पाप लगी । उसिम तै भविष्यके राजा हुइस । राजा मनै अधर्म नै करथ । मै तोर पाछ कौनो हरहालतम नै छोरबुँ। अन्यथा पापके जिम्मा तैं ले।

बत्रा बात तपस्वीके सुन्क राजकुमार पापके प्रायस्चित्त भोगक डर डरागैल ओ तपस्वी जन्नीहँन आपन जन्नीक रुपम स्वीकार कर्ना मंजुर होगैल । ओहाँ बन्वाँम राजकुमार ओ तपस्वी घर बनाक रह लग्थ । बहुत दिन होजाईथ घर आपन राजकुमारी,

दाईबाबा, भैयन सबकोई व्याकुल होगेल रल्ह की अत्रा घेउर दिन फेन घर नै घुम्ना का बात होगैल। की बाघ, भाल, सियार खादरल । मुअला जिअल कौनो खबर नहीँ कैक घरक मनै बहुत भिन्तम डुब्जैठ । चिन्ताके कारण सबकोई भावबिहवल होजैथ ओ हालखबर बुझकलाग चिट्ठी लिख्ना सोंच्ठ । सबकोई सल्लाह कैक चिट्ठी लेख्ठ। आब राजकुमारी चिट्ठी लिख्ना सुरु कैक लिख्थी की:

गिट

यचला छोली छोली मै कगजा बनैबु रे, नैना कजुल मसियानी।

अंगुरी छोली मै कलम बनैवु हो मोरी राजा, अहिरीया आवै ना घरे ।

वाहरे पाछ लिखूँ मै तितरा मंजोरा रे, बिचमे लिखी मेरो सन्देश । और माजु ठाउँ लिखु अपनि स्वरुप हो मोरी राजा अहिरिया आउ ना घरे।।५।।

चिट्ठी लिख्क तयार कैक घरम पालल सुगक घेंचम बाँध डेठ  औ सुगाहन राजअहिरिया शिकार खेल ठाउँक जानकारी करैथ ओ यहँर उहँर अल्मलाइक डर सबचीजके जानकारी करैठ। उत्तर दिशामे आम अमरुद, दख्खिन दिशामे केरा कटहर, पुरुब दिशामे सुन्टोला, पछीउ दिशामे लिची आदी फलफुल बा । इ चारो दिशाके फलफुलके जानकारी ओ  वैरी डुस्मनसे बँचना समेट जानकारी कराके सुगाहन पठादेथ । सुगा उहाँसे चलथ तर सुगा उत्तर दिशामे जाक आमरुदमे भूलके फेन घर लौटट् अंगनाम रुखुवाके पतिया बदर बदर गिरा देहथ । जब राजकुमारी बाहर अइथी त पतिया गिरल देख्ठि ओ कहठि की आझ पतिया के गिराईल कहिक उप्पर हेरथी त आपन सुगा। सुगाहन बाइलम सुगा तर नै आइत राजकुमारी दुधभत लेक बलैथी तब सुगा तरे आईथ । सुगा घर लौटल शंकासे पुछलम सुगा कहलकी चिट्ठी बांधल लसरी घेचा संतियालम घर आईल बहाना पार देहल। फेन घेचाके लसरी ढिलढिल करका पठादेथ ।

अबकी दख्खिन दिशा केरा कटहरम भूलजाईथ। डुसरा बार फेन घर लौटट् ओ ओस्तहींके पतिया गिराईथ त राजकुमारी अचम्म परथी, ओ रुखुवाम हेरथी त आपन सुगा। दुबारा बेर फेन दुध भात लेक बलाक पुछ्ठी त सुगा उह घेचा संतियाइल कहल । दोसर बार फेन लसरी ढिल कैक पठैथ । तिसरा बार पुरुबके दिशाम जाक सम्तोला खैनाम भूलजाइठ ओ घर जाक रुखुवक पतिया गिरादेहथ तौ राजकुमारी जानलेथी की सुगा पक्का फलफुलम भूलक घेचा संतियैलक, बहाना लगाक घर घुमक्क आइठ् कहिक तिसरा बार खोब गरियाके पठैथी त सरासर राजअहिरिया रहल ठाउँ पुगठ् । उहाँ जाक रुखुवाम बैठक पतिया गिराईथ । पतिया गिराइल देखक राजअहिरिया अचम्म परके कहथ औरे दिन पतिया असिक नैगिरठ आज काहे पतिया गिरटा सोच्क रुखुवाम हेरथ त आपन सुगा घेचाम चिट्ठी बाँधल देखल ओ बलाक चिट्ठी खोल्क हेरथ त आपन शिकार खेल आईल खबर लेहक लाग लिखल रहथ। चिट्ठीक हाल सुन्क राजअहिरिया बहुत विह्वल होक घर लौट्ना विचार करथ। उहाँसे फेन आपन हाल लिख्क चिट्ठी लेख्क सुगाके घेचाम बाँधक पठादेथ ।

घर जैना त जैना तर तपस्वी जनीहन कसिक लैजैना बरा समस्या । राजअहिरिया कहल की अत्रा दिनसम तोरसंग खेलहाँस कैदरनु। अब तोर लरका हुईना संभावना फेन होगील बा तै मोर पाछ छोरदे कहलमे तपस्वील कहल की जबतक मोर कोखसे लरकक मुह नै देखतसम तोहीन मै नै छोरम । अत्रा बात कहलम राजकुमार विवसम परगैल ओ तपस्वीहन लेक घर रवाना होगैल। इहाँ घर संझला भैया जानदरलीन की दादु संयुवा बरगके जन्नी लेक आईता कहिक । दादु भौजी घर पुगलम गित गैथ की :

गीत

दादु मोर आइल बनपरुदेश रे, भौजी करली बरी मान।

मथकै तिकुली माथ तुहुकाई हो मोरी राजा, अहिरिया आवै ना घरे ॥६॥

जब राजअहिरिया घर पुग्थ त राजकुमारी सोनक झाँरीम पानी देहथी ओ सेंदुर, फुला घरक सम्मान करथी। ओ कुशलक्षेमके हालखबर लेहथी ओ संगे आईल जन्नीक विषय पुच्छठी । राजअहिरिया विभिन्न बाट मिलाके राजकुमारीहन जानकारी करैथ। बहुत दिनकेबाद भेटघाटमे बिभिन्न वार्तालाप हुइनक बादम राजकुमार मैयाई जैथ ओ राजकुमारी घट्वापानी करगैलम ओ अन्तमा जहाँ जैना उहाँ जैना कर्लग्ल। घट्वा गैल्म घट्वाम जाक पानी पिनक बहानाले पानी मंगथ ।

गीत

सुन तै अगुली सुन तै पछुली, सुन तै बिचकी पन भरनी।

बुँदा एक पनिया पियाई देओ हो मोरी राजा,

अहिरिया आवै ना घरे ॥७॥

तब बरकी जन्नी कहठिस की अत्रा दिन मैयाँ नै लग्ना, भख्खर मैया लग्ना त पाछ पाछ कर ना, कहिक गितम जबाफ देहथीन।

गित

राजकुमारी- सोन सुतरी मोर इँररा बिरँरा रे, रुपनकै घैला ।

जेकर मोल लछत्तर रुपियाँ हो मोरी राजा, अहिरिया आवै ना घरे ॥८॥

यकर बादमे दिन विटल साँझ हुईल । संझला भैया ज्ञानगुणके सिपार रहलीन । आप दादुहन एकान्तम लैजाक, भौजी सँप्वा बर्गके जन्नी हुई, जन्नीक संग रातक नै सुत्ना, एकम सुतलसे सँपवा रातके मुवाँदारी कहिक राजअहिरियाहन जानकारी करैथ ओ बँचक लाग रातभर खटिया भांगक रात कटैना जुक्ति बता डेहल । रात हुई, नंगा खटिया मगा गैल ओ खटिया भंगना लसरी मगागैल । खाना पिना खाक आराम कैक सुत्ना घरिम राजकुमार कहलकी दोसर जन्नती लन्लसे लावा खटिया अप्नही भाँगके किल सुते मिल्ना हमार चलन बात तबमार खटिया भांग लि तब ख़तियाम सुतबी कहिक खटिया भांग लग्ल। गोंरी दारौल, कुछ बध्धी भांगक विगरगैल कहिक घरिघरि उघल्ना, फेन भंगना करलग्ल । भांगफेन घरिघरि उघल्ना देख्क तपस्वी जननी मिच्छाक कहथी कि:

गित

घनि खाट उघले घनि खाट पघले, तुहारे दादु जे बरी भकभोंदना।

सारी रात दिया देखाई हो मोरी राजा, 

अहिरिया आवँ ना घरे ॥९॥

घरिघरि ओस्टहिंक करके रात बितल । रात बिन्नक बादम काल्हीक रात राजअहिरीयके संझला भैया कहलिन की दादु रात तसिक तसिक विटौल तर यकर दोहोलो कटैलसे मात्र एकम सुत मिलि। भैयाके अत्रा बाट सुनक राजबहिरिया कहल की भाइ जन्थो कलसे यकर दोहलो कटा दी। दादुक बात सुनक राजअहिरीयाके संझला भैया चुप्पसे बरग कटैना हरेक सामग्री जुटाई कहिह सामान जुटल बादम गाउँसे बाहिर जाक तपस्वी जन्नीक बरग कटादेथ। एकरपाछे दोसर दिनसे राजकुमार राजअहिरिया दुनु जन्नीनके संग ओ आपन घर परिवार से अमनचयनके साथ रहलग्य। लावा जन्निके परछौटीके लाग बहुट बहुट । सरजाम कार्थ ओ देश देशके राजा रजौटन निउँता देजाजाईथ। धुमधामके साथ परछौटी करना योजना बनल। परछौटी करना गते बार फेन तोक गैल ।

बहुत भारी सरजामके साथ परछौटी कैगल। बरा बरा राजा रजौटा निउंता स्वीकार कैक परछौटीम आईल रहलह। मही फेन बत्कोही बतोइलक सातो भोज खाक जाइ कहतलह'। तर मै कहनु की आजकाल बहुत जार बा, खैना त कहाँ जाइ, पर जिउ बाँची त खैना सब दिन मिल्ती कहिक मै जारसे थुर थुर लगलगैटि घर आगैनु । औरजन प्रेमके साथ खैती रहल।

साभार- हरचाली त्रैमासिक

-मोहनलाल चौधरी

धनगढी-८ धनगढी गाउँ, कैलाली