शिव शंकरके बुटी

 शिव शंकरके बुटी

बन्वामे जमल तमान जडिबुटी मनसे एकठो जडिबुटी बा। जिहिहे जाँरक विरुवा कहि जाइठ। उ जाँरक विरुवक कोइ जर कोरके नानट ते उखारके, कम जैसिक नन्लेसे माने काम लग्ना ओकर जरे हो। जरहे घामम सुखवाके ढेकीम कुट्‌के मसिना बनाके, चाहे जरहे पिस देउ। जैसिकफे जरहे मसिना बनैना बा । जरहे मसिना बनाके खुडिक पिठामे सानके उहिहे कण्डाहस भौरी पारके, ठप्ठ्याके घामम सुख्वाइ परठ। सुखके सेकबो ते जाँरक विरुवा पूर्ण रुपमे तयार हो जाइठ। जिहे कठै मनै जाँरक विरुवा।

जाँरक विरुवासे जाँर बनाइक लाग बतला या बतलीमे जाँरक नाउँसे भात रिझाके चाहे खाके उब्रल भातमे जाँरक बिरुवा घाँसके फेन जाँर बनैठे । बटला या कौनो भाँरामे भात रिझाके टट्ले भात केरक पतम या जेमे फेन अख्याइ परठ। जाँरक विरुवाहे खुरबुश्नी पारके ओहे टट्ले भातमे जाँरक विरुवा खोब खस्मोरेक एक परठ । खस्मोरके सेक्के कोइ छिटुवामे बरसाटी बिसाके दार्ता ते कोइ भुँइयामे बर साटी या केरक पट्टा बिछाके धारठै। बिना बरसाटी बिछैले झरबो टे जाँरक झोर चुहना डर रहठ । छिटुवामे धारके खोब मजासे बरसाटीसे सेहके उप्पर से चकियासे डबाके धारक परठ । कौनो जाँर महा जल्डी बन जाइठ ते कौनो एक, डु रोज लाग जिठीस। जाँर हुइठ ते बास देहे लागठ । नाइ ते चिख्के पता चलजाइठ्। जाँर तयार हुइल कहिके। जाँर तयार हुइठ ते कठै जाँर उठ्गील आब । तब उही कठै जाँर। उठल जाँरहे कोइ प्लाष्टिक डब्बामे धरीहीं  टे कोइ भोकरीमे । ओहे ढारल जाँर पिनास मन लागलमे बनकसे, फाँटल चिंठल टापीसे या कौनो चिजसे झाबके पिना चलाऊ बा । कत्रा छब्लेसे अत्रा मनै पुगे काना अड्कल करे परठ । तब ओहे अनुसार जाँर जाबे परठ। बनकस ओ टापीसे जाँर छब्ना कलक जॉरेमनिक सिष्ठा निकर्ना हो। कोइ बनल जाँरहे घिघोरवाके रुपमे पिठ ते कोइ कहठ घल्हका नान ते । जाँरहे कोइ जम्मा जाइठ ते कोइ डारु बनाइक लागे ढरले रठैं । जाँरहे कोइ आमिल बटाइ टे कोइ चुच्वाइल बा कहि कोइ गुरी जाँर बा कहिके कठै।

दारु काना एक प्रकारके तरल पार्थ हो । डारु बनाइक लाग बटला, बटली, डोंरया चाहथ। सबसे टरे बट्ला, डॉरिया, बटली क्रमशः ढरल रहठ। बट्लामे डारु बेठैना जाँर ढारल रहठ, बिच्चे डोरया ढरल रहठ, आउर बट्‌लीमे उप्पर पानी ढरल रहठ। आगी करलेसे जाँर मनिक शक्ति ढिकके बाफ बन्के पानी रहल बट्‌लीमे परठ ओहे ढिरेसे डोंरयामे आके डोंरयक डण्डी-डण्डी पानीके रुपमे आके करैमे या बोलमे चुहाइ सेक जाइठ । कौनो डोंरयामे डारु भित्रे जम्मा हुइना बनाइल रहठ । जौन डारु एकडम तेज रहि ते उ डारु आगीम भ्वाङसे डमक जाइठ। सब फिल्टर होके आइल तरल पदार्थहे डारु कहि जाइठ ओ डारु कहके चिन जाइठ । डारुमे चिनी डार्के मिठैया डारु बनाइ सेक जाइठ। मौहृवा डार्के मौहृवारी डारु बनाइ सेक जाइठ। डारुफेः कौनो महा तेज, कौनो झरस्‍यान, कौनो आमिल, कौनो गोडामिल रहठ। यीे टे शिव शंकरके बनाइल बुटीसे जाँर डारु ।

अब कथा/बट्कोही सुनी। शिव शंकरके बुटी जडिबुटीसे बनाइल जॉर डारुके सुहावन कहानी।

तब बक जमानकबाट हो । भगवान सक्कु जहान काम बाँट्के काममे खटा डरनै । काम किल काहे करैना हो कहेके एक दिन पार्टी खवैना सोच बनैठैं। काम टे कामे हो जिन्गी भर काम करके कहाँ हुइ। कहाँटक और जनहनहे काम किल करैना हो कना सोच भगवानके अइठीन । तब्बेसे पार्टीके आयोजना बनैठैं भगवान । सबके इच्छा, चाहना रहठ। मजा खाँउ, मजा लगाउ, मोज मस्ती करू कना। बह्रियासे जिन्गी गुजारा चलाउँ । हमार फे ओहे चाहना, इच्छा वा भगवान कठै। अौरे जाने कहाँसम कामे किल करही । काम करलक दुःख बिश्रावन कुछ-कुछ टे पार्टी करे परल। देहे परल। तबेमारे हम्रे काहे काम किल करना। उहाँहुकन्हे कुछ मनोरञ्जन, राहरंगी, सयर कराई। जिन्गिके मजा लेहवाई। कुछ देब ख़वाब तब ते काम करुइयन हे काम करे बेर फेन मजा लग्हिन कना हिसावसे भगवान सक्कु जनतनहे पार्टी देना सल्लाह करठै। सब जाने पालिक पाला आपन शक्ति के अनुसार भक्ति लगाके सब जनहन सेक्नासम खैना पिना खवैठैं। आपन पाला अनुसार खाना खवाके आब पाला अइठिन शिव शंकर भगवानके ।

सब भगवान आपन पाला अनुसार के साधारण मनैनहे, काम करुइया किसानहे, आपन ईष्टमित्रहुकनहे पालिक पाला सक्कु जनहन पार्टी डेठै । शंकरकेफे पाला अइलक ओरसे पार्टी डेनाके तयारी टामझाम करठै। शिव पार्वती आपन सेक्ना अनुसारके तामझाम तयार परठै। सब भगवान के नन्हे कुछ कम नइ हुइना हिसावसे लागल रठै तयारीमे । जब तमझाम तयार करके सेक्ठैं । सक्कु जनहन खवैना बिचार हुइठीन। एक जनहनफे नइ छोरके खवैना सल्लाह करठै। जहाँ सम सेकब ओहैसम सक्कुहुन खवाब काना विचार हुइठीन। आपन गोस्याहे पार्वती कठै जाउ टु आज जहाँ सम्म पुगे सेक्बो सक्कुउहाँ पुग्हो । सब जनहन एक नाइ छोरके बाल बच्चनसे लेके सबजन बलाइहो आउर नेउटाहो कठै पार्वती शिव भगवानहे । शिव भगवान चल परठैं पार्टीके नेउटा नेउटे। एक नाइ छोरके सब जहन नेउटठै। नेउटके घरे अइठै। दोसर दिन पार्टी खउइयनके लाम लागल अइना काम चालु हुइठीन। आपन मन्का सक्कुजे खइठै । हिक्षा पुरा कैके खैठैं । अौरे भगवानके जस्टे बदनाम नइ हुइना हिसाबसे खबैठैं । माने हुई का जात्रा खवाउ सबके चाहल अनुसार खवाई नाइ सेकजाइट । एक ना एकजे बदनाम करी डरठै। ओस्टके शंकर भगवान पार्टी खवाके सेक्लै। अब सब जाने लग्गे टे मजाके खैली काना हुइलै । मने यीने मजासे खैलै कि नाइ खैलैकाना बात आपन संघरियन डगरीम जरुर बत्वैही आउर बात करही काना मनसायसे पार्टी खउइयनके चिमा लागे चलजिठै। शिवालय मनसे आइट डगरीम बन्वा परठिन। शंकर भगवान बन्वामे  आके डग्रीटर नुक्के खोब बात ओनइठै। केउ का बथ्वाइट टे कोइ का? कोइ कहट उ नइ पुगल, कोइ कहाट उ नइ पुगल। केउ कहत शंकर भगवान पार्टी खवैना टे खवैनै मने जाँर दारु नाइ खवैनइ ते कुछ नइ खवैनै काना बात अइठिन । लगभग जम्मा जनहनके मुहसे ज्यादासे ओहे बात निकरठीन। यी भात तिना ते जौन भगवानफे खवैनै । मने मजा नाइ आइल। कुछ  औरे भगवानसे नया नौलो खवैटै टे मजा आइट काना बात करठै। शंकर भगवान जाँर दारु खैना मनै। जाँर डारु पला रठिन। उहाँहुकाँके झुन जाँर डारुके अस्रा रठिन। तब शंकर भगवान आपन कैलाशमे जाके फेनसे पार्वतीहे पार्टी डेना बात करठै। फेनसे तयारी करठै । फेनसे जम्मा जनहन बलैठैं। सक्कुजे अपन चाहना अनुसार भात, टिना, खैठैं । भात खउइया भात खैठैं। जाँर पिउइया जानर पिठै। आपन मागन अनुसार जाँर, दारु, निघाँर, जाँरक झोर, छबुवा, डबुवा, भात, टिना खैठें पिठै। मस्तसे साँझके घरे चल जिठै। जाँर पिउइयनके रात हु जैठिन। ढिरेसे जाँर, डारु पियट-पिट। फेन चिमा लागे जैठैं। सब्जे आपन आपन बाट बत्वइठै मने गुनासो भर अक्को नइ पोख्ठै।

शंकर भगवान पार्टी खबैलक चिमा लगके प्रतिक्रिया बुझ्लक ओरसे औरे भगवानसेफे मजासे पार्टी खवैनई काना बात फैलठ । और भगवान भर पार्टी खवाके प्रतिक्रिया नाइ बुझलक कारण मै पार्टी कैसिक खवैनु कना पता नाइ चल्ठिन। तबेमारे प्रतिक्रिया लेना, बुझ्‌ना जरुरी बा। शंकर भगवानके भर एक काम गरबर हुइल रठिन। जाँर डारु पिके मत्वार हुउड्यनके गिरके आँखी फुटगील रठीन, केक्रो कहाँ चोट लगल रठिन टे केक्रो कहाँ । उहाँहुकनके मेधारु शंकर भगवान ओ पार्वतीहे गरयाइ लग्ठिन। पार्टी खवाके मोर मेधारुक आँखी फोरवा डेलो। अब मै उकिहिन कैसिक पालम। कहाँटक स्याहार सुसार करम । तब जाके पार्वती शंकर भगवानहे गराइ लग्ठै। जाँर, दारु, भाङ, गाँजा बनाके खाइ जन्लो यकरं उपाय भर बनाइ नाइ जन्लो । तब शंकर भगवान कठै कि जाउ आबसे जाँर दारु जत्रा पिही माने ओकर आँखीम भर कबु चोट नइ लग्हीस भले भाँउ फुटजिहीस माने आँखी भर नाइ फुटीहीस कना वरदान, वचन आशिष डेठैं। शिव शंकरके बुटीफेन अब कभु नइ छुटी । जाँर डारु पिके अब घिबिर घिबिर मुटी। मौहृवारी, स्पेशल घरैया जाँर डारु लगाके मड्वा मनैया अब दिन उठवा सुटी। जबसम जाँर डारु नइ पिइ तबसम पटा नै डारुके नशामे जुम्के अाब दुनियाँहे लुटी। जरूर डारुमे मतवार कैना महा शक्ति रहठ यह विरुवाहे कठै आब शिव शंकरके बुटी।

शिव शंकरके बुटी कभु नाइ छुटी काना टुक्कासे शंकर भगवानके बुटीसे बनाइल जॉर, डारुके मट्वार कबु नाइ छुटी काना अर्थ देहठ। जबसे शंकर मुह फोरके जाँर, डारु पिउइयनहे बरदान देनै ओठ्ठसे जाँर, डारु, निघाँर, गाँजा, भाङ पिउइयनके आँखीम चोट नइ लग्ठिन काना किवदंटी बा। भगवानके खवाइल पार्टी मनसे खोट निकर जिठिन कलेसे साधारण ओ धनी मनैनके खवाइल पार्टी मनसे खोट निकरना टे स्वाभाविक हो । पार्टी कना चाहे जत्ना मजासे खवाउ एक ना एक चुटी खोट, 'नई मजा हल्का, बदनाम हुई जाझ्ठ कना  सन्देश यी काथा मार्फट पहरके जाने सेक्ठी। अत्रै हो बात अट्टै हो चिट । हसिया लेबो कि बेट ? बेट। टोहार आउर मोर सदा दिन भेंट । धन्यवाद

साभार-हरचाली त्रैमासिक

- दुर्जन कुमार चौधरी

गदरिया-६, बेनौली कैलाली