बर्डिवा सोमैया

बाहर कैंयाकुचिल अंन्धार बा। रातीसे झाउ झाउ पानी परटी बा। बाहर के मौसम फेन जुरार बा। घर से बाहर निकर्ना केकरो हिम्मत नै हो । सावन, भदौक महिना। चारुओर डिहवामे मकै अर्राइल बा। सोमैया भिन्सारे उठ्के घारीक गोरुनहे बुसा डार्के सुठल रहठ। ओकर खास नाउ ते सोमै रठिस, लेकिन सक्कुजाने उही मैगर मानके सोमै कठिस । खेतजोतनी ओराके सब भितरियन फुर्सदमे रठाँ। लेकिन सोमैक काम आब सुरु हुइलरठिस । सोमैक विहान अन्गुट्टे गोरु छोरना रठिस। बरखामे गौह्री फेन भिज्लक कारण गोरु गोठाई कोइनै लैजैठाँ। सक्कु बर्दिवन घारीमसे सोझे गोरु चह्राइ बन्वा लैजैठाँ ।

आज सोमैक मन अगुनमनछगुन कर्टिस। सब मनै घरेम भुजल भुजा भरठर मसर मसर परटी बैठरठाँ। घरक छरनेतिर पानी भरकलग भाँडा डोगलरहठ। भितरियन बर्खक ओरसे बाहर काम करे जाई नैबनके घर बैठल कोई खटिया भांगठ, टेकोई खर्रा बिनठ, कोई जाल बिनठ, सब आपन हर्चाली लेकेरठाँ। लेकिन सौमैक बाध्यता गोरु छोरही परना। काकरे की उ जिमदारके बर्दिवा बा । गैया, बर्धा, बछरु कुल मिलाके तीन दर्जन गोरुनके देखभाल कैना जिम्मा बटिस। हुना टे सोमै वहाँ भरखर लग्लक टे नै हो । ओकर बाबा पहिलेसे जिम्दारके घर कमैया बैठ्लक ओरसे छोटहीसे उ जिम्दारके छेग्री चह्राए। मने आब बर हुके भोज फे कैराखल ओ ​​रोइना नाउ हुलक ओकर एकठो छावा फेन बटिस । पहिले जरावर पर किल छेग्री चह्राए, लेकिन आब टे बरस भरीक छत्तीस मन तौला मसुरा खैना लायक हुराखल । एक खाँरा छेउटी फेन टे पैलेबा । इहिसे लटरपटर आपन परि वारके निबाह चलाईठ। ओकर अत्रेमे सन्तोष बटिस, उ अपन जिन्गी खुशीसे जिएटा ।

तीन दर्जन गोरु देखभाल कैना किल नै की आउर बहुट ढेउर जिम्मेवारी फेन बटिस समैक । बर्खामे छटरी बिन्ना, हेल्का बिन्ना, सुटरी कट्टा, सिकहर बनैना, हर्चाली रठिस। भन्सरियनलग नम्हरैनके पटिया टुरना, मिल्लेसे सुखाईल काठी लानडेना, जिम्दरवक लरकनलग खेलौना खरखरिया बनैना लगाएत काम फेन करही परठिस। आपन परिवार लर्कापर्का पालनपोषण पोषण कैना टे पर्ली बा । लेकिन आप परिवारसे अधिक मालिकके घरक टन्टा कैटी ठिक्के रठिस। मल्कानहे खुशी पर्ना उ आपन धर्म सम्झठ ओ गर्वके महसुस करठ ।

उ दिन घारीक सब गोरु अक्टाईलरठाँ। बाहिर निकरकलग छटपट छटपट करटीरठाँ। उहे समय सोमै खँखरटी घरक भित्तर पैठठ। ओकर चाल सुनके गोरु कान ठार पारके सुन्ठाँ, टकपक टकपक चिटिलगठाँ। सोमैक सब गोरुनसे बराबर आत्मीयता रठिस । गोरुनके फेन सोमैकपर बहुट भरोसा रठिन् । काकरे की उ सकभर सबके पेट भरल नैभरल ख्याल करठ, सबके देखरेख करठ। ओकरलग सब बराबर रठिस। उहेकमारे वहीहे छोट का बर गोरु सब मालिकहस मन्लेरठिस । कौनो गैया या बर्धकमे कुछ हुजाई ते खरपटोर विरुवा फेन करे जन्लेबा उ ।

ठोर ठोर पानी फटियाइठ, बदरी उघरठ। सोमै भटौर खाके भुजा, अदुवक चटनी, गोलरामे छबुवा जाँरक मिझनी बोक्के छतरी ओहरले घारीओर गोरु छोरे नामठ। घरिक गोरु छोरठ, गोरु छटकटी निकरठाँ। बनवा जैना डगरम लदिया बाह्रले भरल रहठ। रातभर पानी वर्षलक ओरसे लडियम डुम डुम बाह्र आईल रहठ । डुनु दिउ छल्कटीरहठ बिच्चे बिच्चे डेहरीहस बरे उप्पर उप्पर डुम्मा उल्रटी रहठ। गाउँक मनै फेन बाह्र हेरे निकरल राठाँ । कोइ ढाँगवा मच्छी मरनामे व्यस्त राठाँ । कौनो गोरु लडियम पैठना हिम्मन करे नै सेक्ठाँ । एक घचिक बाद बाह्र कुछ कम हुइठ टे सबसे पहिले लढ्यौना बर्धाहे सोमै आघे लगाइठ । आपन आपन लुग्गा लगायत जबियक समान कपारीम बांधठ, एक हाठेम आपन लाठी ओ मिझनी लेहठ डोसर हाँठमे छटरी, बसराठीले आफ्नेफेन पाछे पाछे लडियामे कुद परठ। सब गोरु एक पाछे डोसर झ्वाँम झ्वाम झ्वाम कुड्ठाँ। लदिया पारकैके सब गोरु बन्वा पुग्ठाँ। पानी दिनभर सिमसिम-सिमसिम पर्टिरहठ। गोरु मास, दाशसे बचकलग झालापाता खैटी झन टिकरा पर्वताओर लग्ठाँ। उप्पर पर्वतवामे फरछवार फेन रहठ। बन्वामे गोरु छोरके सोमै आपन हर्चालीम लाग्जाइट । सोमै भन्सरियनके डुलारु रहठ । काकरे की उ भन्सरियनलग पातक टुट्टा परे नैडेहठ । ओहेकमारे भन्सरियनफे मजा मन्ठिस । ओकर कलक जुन भटौर तयार कैडेठाँ। आज फेन ओकर पाता दुरना रहिस। गोरु आपन सुरमे चह्रे भिलरठाँ। घनमन घनमन घण्टक बोल ओनैटी एक बेरी नमरैनके पाता टुरठ। अस्तके एकठो पियारुक खरखरिया फेन कटिठ । छटरी निर्माणकलाग एक मुठ्ठा खेजरीक डाँठ फोन काटठ । अत्राले ओकर भरुवा पुग्जैठिस । कुछ दुर जाईठटे संयोगबस जरहनियाँ भेम्टी फेन भेटाईठ, उहो पोकरी पारठ ।

सोमैकलग वनवक जीवन रसदार रथिस। उही घरसे बन्वा जो चैनार लग्ठिस । बन्वामे जाके आपन हर्चालिक संगसंगे काठी करुइया बठिन्या या जन्नीनकेलाग काठी चिरडेना, बोझा बनाडेना, भरुवा उचिया डेना, संगसंगे गफ लोरैना डिल्लगी कैना ओकर दिनचर्या रठिस। उहेकमरे टे उ सब कठेहरीनके डुलारु बा । हरदम काठी करौनी चुक्की खैबेर बठिन्यन उही अनिवार्य बलैठिस। ओकर जवियामे बसिया कब्बो नै छुट्ठीस। बसिया बजैनम फेन महा सिपार बा सोमै। उत्तर बनवामे जब सजनक धुनमे बरे लम्माके पिलिलि बसिया बजाईठ ते सब कठेहरी बठिन्यन बसियक धुन सुनके ओकर पर मोहित होजैठाँ। आजकल आपनसंगे रलक परिवार फेन ओस्टे मोहित कैके भोज कैलक टे हुइस।

आज बर्खक मारे ओकर डेंह जुरार हुरख्लेरठिस । ओकर जिउम जारक मारे काँटा फुलल रठिस। ठोर ठोर लगलग्गी पकरलेरथिस। ढुंगापर बैठके आपन जबियमसे झुला ओ लाइटर, माखुर निकारठ। सखुवक पटियक खाँची बनाइठ । एक बेरी माखुर मेठके भर्ठ ओ झुलक आगीले सुगाँके धुवा फुर फुर उराइ लागठ । जुराईल जिउ कुछ डम्डर हुडल हुईल महसुस  हुइठिस सोमैहे ।

साँझ हुईठ, घण्टा टरे बोलठ, घण्टक बोलके सरने सोमै आपन सरसामान लेले टरे ओल्हाइठ। उ बन्वमसे निकरजाईठ, जहाँ गोरु आके गौरह्यैठाँ। उ ठाँउपर सारा गोरु आजैठाँ । लेकिन एकठो गैया आइना ढिला करठ। गोरुनहे घरक डगर लगाके सोमै गैया खोज्टी फेन बन्वाओर टिकरा लागठ । सोमै आपन भाषामे से .. से...से... करटी जोर से गैया बलाईठ। गैया सोमैक बोल्ने विचार लेहठ । ओहोरसे गायक आवाज आईठ बाँ... बाँ....! सोमै ढुक्क हुइठ । वहाँ गैया बच्चा पैलेरहठ । सोमै खुशीसे गदगद हुईठ । हुआना टे सोमै मनेम शंका टे लागलरहिस लेकिन कहिया बियाई काना पता नै रहिस। पुगठटे गैया, आपन बच्चाहे चाटके सेक्लेरहठ। बच्चा लडवड लडवड लेके ढिरे टरे ऐटी रहठ। झोल्पट हुइटी रहठ, बन्वक सब गोरु निकर सेक्ठाँ । सोमै बछरुवा हे कन्धामे लप्पसे उठालेहठ ओ पाछे पाछे गैया गैयाहे लेले घरेओर लागठ। सोमैक बछरुनपर अटना स्नेह वटिस की सायद सोमै ओटना ते आपन लर्काहे मैया नै करठुई। आपन हर्चालिक भरुवा ओ बछरुवा बोक्ले उकुस मुकुस कैटी सोमै कुछ रात घर पुगठ । घारीम सारा गोरुन हेरठ सब गोरु आइलरठाँ लेकिन हरहटवा बर्धा गायप रहठ। सोमै जानलेहठ पक्का है खाइ टे गल हुआ कहिके । रात छिप्टीजाइट। सोमै गोरु करियाके आपन घर ओर लागठ।

सोमैक बुढिया आपन घर जिम्दरवक घरसे बेरी लैजारख्ठीस । सोमै जबसे बर्दिवा हुईल ओ भोज कैल तबसे साँझके आपन घर खाना बोक्के खाईठ । हुईना फेन हो दिनभरीक सिहरल जिउ आराम फेन करे परल। साँझके एकघचिक हुइलेसे आपन परिवारके संगे खाना खैना ओ दुःखना सुखना वाट कैके मनहे बहलाई फेटे परल। ओहेकमारे उही बेरी आपने घर खाइ जैना मजा लग्ठीस। खानपिन कैके सब परिवार सुत्ठाँ लेकिन ओकर निन्द नै पर ठिस। सुर्ता हरहटवा बर्धकमे लागलरथिस। उ जानठ की मजा हुइलेसे सब मलिक्वक लग्ना ओ कुछ बिगरलेसे आपनपर दोष आइना हो। भिन्सारे हुइ ठ टे उठके एकचो घरिओर हेरे जाइठ लेकिन बर्धा नै आइलरहठ । आउर दिन टे है खाके ससन मसन आजाए। लेकिन उ दिन रातभर नै आइल।

बिहान हुइठ । सब मनै चाल पालेठाँ। गाउँमे हल्लीखल्ली मचजाइठ। साराओर उहे चर्चा चडगठ, सोमैक बर्धा गर्धुरान डिहुवक मकै सब खाडरल । धनी मोछ आईल मकै बरबाद कैल कैहके गर्धुरिया बम्कठ । गरधुरान बर्कवा गरधुरिया बिहान हाँक पराईठ ओ जुटौला कराईठ । बिचारा सोमै ओहोर गोरु छोरना हटार रठिस । डटकरल विहाने कचेहरीम जाईठ। गाउँक जिम्दार बैठलारठाँ। सब्जे उही दोष लगैठिस। काकरे लापरवाही कैठे ? सब्जे ओकरेपर अंगरी डेखैठिस। लेकिन सोमै उ दिनके सारा वृत्तान्त्र सुनाईठ । टब्बो पर ओकर बात सुनुईया कोइनै रठिस। सबजे उही दोषी डेखैठिस। ओकर जिम्दारुवा अक्केली ओकर ओरसे लग्ठीस । ढेर जानेनके आगे ओइनके कुछ नैलग्ठीन । आखिर मे कचेहरीमसे ५ सौ रुपियाँ खारा मरना निर्लय कैठाँ। उ फेन आधा जिम्दारुवा, आधा सोमै सहे परी कर्ना सहमटि कैठाँ। विचारा आपन काम इमानदारीसे कैटी कैटी फेन निरीह हुके जिम्दारसे ऋण कैके आपन वखरा खारा तिरे परथिस। सोमै कचेहरीसे उठके मनमरले फेन उहे आपन डिचर्यामे लागठ।

उ दिन दिनभर ओकर दिमाग खराब रठिस । मनमे धेरै खेलाईठ। एक मन टे कठिस की बर्दिवा छोरके आब ईन्डिया लाहुर खाइ भागजाउ। लेकिन गाउँ नियम फेन कर्रा रहठ। लग्लेसे सित्तीमित्ती सोरे नैपैना। नियम सम्झठ, आपन रोइना छावा सम्झठ, आपन जन्नी सम्झठ। सक्कु गैया, बर्धा, बछरु सम्झठ। भागके गेलेसे सबके विचल्ली हुई काना सोचठ। जौन परि परि कहके धिर्खा बाँधके आपन मन सम्हारठ। दुःख सुख कुछ साल उहें काम कैना निर्णय लेहठ। ओआपन पुराने अनसार दिन ढकेलठ । असिके सोमैयाहस तमान गौप्राणी समये बिद्रोह नै करे सेकल ओर्से टमान मुक्त कमैयनके मुक्ति बरा ढिला हुइलिन । हो कि नै पाठ बृन्द ?

साभार- हरचाली त्रैमासिक

- शत्रुघन चौधरी