Yad Aitha-2 || याद आइट पाठ-२ || Batkohi || Naina se Naina milal

हजारौं मनैनके बगालेम कसिके एकठो छैलिक् मे लजर परल । उ फेन घुम घुमके मोर ओर हेरटहिन । साइद हुँकिन फेन कुछ कुछ हुइटहिन जस्ते लागल । मोर मन हुँकिन हेर्टुरहुँ कहटहे । 

बाट घनगढी जाखौर टलुवाके हो । डसियाके बिदा हुइल रहे संघरियन सबजे घुमे जैना सल्हा कर्के निकरल रहि । बरे भिरभार रहे साइड सब स्कुलिक् छुट्टि रलक मारे हुई । जहोर जाइ ओहोरे क्यामरा के आघे सुघ्घुर सुघ्घुर लौन्डिन अपन अपन एक्सन मे फोटो भिडियो सुट करट डेखपरे । मेरमेरिक जाटिनके पहिरनमे संपरल बठिन्यन हेरेमिले । नै हेरके फेन मन काहाँ मानी काहेकि ढेर जाटिनके पहिरन हेरे मिलटहे जोन पहिरन कबु नै डेखगैल रहे । उहे बगालेम उ फेन संपरल रहिन।

 

जब हुकिन डेख्नु हेर्टिक हेर्टिक रहगैनु । टुहार उ रुप मोर होसे उरालैगिल रहे । असिन हुइल रहे कि मोर आँखिक पल्का झिम्कबोनै करे टुहार हाँठक् चुरिया, पाउके पायल माठेके टुकुलि, कानक झुम्का, कजरार आँखी डेख्के कवागैनु  । मन कहे लागल हुँकारे संग रमाउ हाँसु खेलु । हुँकार उ फुला जसिन रुप अपन बहियामे भरलिउँ जसिन । 

मोर डिलके ढरकन ढकढकाइ लागल । कहोर कहोर घाम लागे हस करेलागल मन कुल्बुलाइ लागल । मनेम अनेक बाट खेले लागल । हुँकिन टरे से उप्पर हेर्नु मोर परगा ट्क्कसे रुकगैल इ जिउ बहक गैल केबल टुहारे लाग छट्पटाइ लागल । टुहार जोन्ह्या जसिन अनुहार पागल बनासेकल रहे । टुहार रुपके के दिवाना होसेकल रहुँ । हुँकिनसे  एक पलडुर हुइनै सेकटहुँ । असिन लागेलागल हुकिन अपन बनालिउ, बराट लेके आउँ ओ डिलिम उठाके हजारौं के माझेमसे घुरघुट ओर्हाके  डेउटनके सामु कसम खाके अपन बनालिउँ । तर उ सब हुइना असम्भब रहे काकरे मै एकठो कल्पनामे डुबल रहुँ । हुकार डिलमे कोइ डोसरजे रहल हुहिन । उ कक्रो रोजल फुला रहल हुहिन मोर जुम हुँकारे संग लजर मिलेपुगाल । बोल्ना आँट फेन नै रहे काहेकि उ बगालेम रहिन । ढिरे ढिरे उ मोर लजरसे ओल्टार होगैलिन । 

अभिन फेन महि नैनासे नैना मिलल कना म्युजिक भिडियो  उहे रुपके परिके याद करादेहट । उहे रमझम के याद कराडेहट । 

गणेश ओ समीक्षा के मिठ अवाजमे रहल मैयाँ लग्टिक् गितके शब्द फेन गणेश के बटिन । भिडियो मे मुख्य भुमिका  वीर चौधरी ओ मधु चौधरी के बटिन । गित भिडियो बरे मजा बा हेर्टि रहुँ सुन्टि रहुँ लागट उहे सम्झना आइट् ।