मायाके चिठ्ठी-२
"एकठो गाउँमे माया रहिन । जस्टे नाउँ माया फेन ओस्टेहे रहिंन बरेसुग्घुर । गाउँमे हुँकार छोटमोट मिझ्नि पसल फेन रहिन । चिया से लेके कलुवा मिझनी खाइ मनै उहाँ अइना करिंट । माया के बोली बरे मिठास टेलार रहिन । बहुट मनै हुँकार गफ ओनाइ अइन ओ रमैना किरीट । एकठो हुँकार संघरिया फेन रहिन "प्रेम" बरे मिल्ना एक डोसरहे बहुट मानिट एक्के संगे खैना सुट्ना खेल्ना रमाके ओइनके डिन बिटिन तर समयके खेल एकरोज डुनुजे बरे डुर डुर होगिलैं । भेंट नैहुइना एक डोसरसे बाटचिट करे नै पैना । आप बाट कर्ना एक्ठो किल माध्यम रहिन चिठ्ठी !हाँ उहे चिठ्ठीक् साहारासे उ डुनुजे बाट करठैं । "
पहिला चिठ्ठीमें माया प्रेमहे अपन मनक बाट असिक लिख्ले रहिन ।
प्रेम आप टे हम्रे बरे डुर होगैलि । टुँ कहाँ मै कहाँ डेख्लक् ढेरडिन होगैल बा । टबफेन मै चाहटु टुँ मजै हुइबो । प्रेम टुँ जहाँ रलरसे फेन मै टुहाँर मायामे बचल बटुँ । ओ मै टुहिन मनक बाट इ कलम ओ कागजके साहारालेके सुनेना चाहल बटुँ साइड मोर चिठ्ठी टुँहार ठन जरुर पुगि ओ स्विकार कर्बो ।
प्रेम मै जहाँ रलसेफेन मोर मनक भावना हरडम टुहाँर ठनरहि । जब मोर याद संटाइ लागि कलेसे मोर चिठ्ठी हेरलेहो । टुहिन पटाबा हमार आत्मिक सम्बन्ध कत्रा बलगरबा । टबे मारे इहे संम्बन्धमे आउर बल्गर गाँठ पर्ना चाहल बाटुँ । प्रेम शरीरसे हम्रे लग्गे रहि टर अब्बा बरे डुर बटि । सरिरके रेखडेखके लाग असिके डुर हुइपुगल बटि । उहेटे कठु शरीर टे कुछ समयके लाग बा हम्रहिन बहुट कुछ करेपर्ना कर लगाइट् जेकर कारन हमार सम्बन्ध सराइ पुगट । शरिर हमन धोखा डेलेसेफेन आत्मासे कबु डुर नै होप । महि यादबा टुहार मनक भावना ओहे मारे हमार सम्बन्ध कोइ छुटाइ नैसेकि ।
प्रेम हम्रे आत्मासे बहुट लग्गे बटि । शरीर हेरके किल मनक सक्कु बाट बुझे नै सेकजाइट । मनक बाट बुझकलाग टे मनक् बाट सुने परट मै फेन टुहार मनक् बाट बुझ्नु । टुहार मनक् बाट ओ मोर मनक् बाट एक्के लागल । सरिरके का बाट करु आज बा काल नै रहेसेकट । इ टे डु डिनके फुला जस्टे हो । ओहे टे कठुँ " शरीर हे मैयाँ ना करहो इ टे कुछ डिनके हो । माटिक बनल शरिर हो, एकठो आँखिक सोभा किल हो । आत्मिक् भावनाहे मैयाँ करि, इ नाट अमर रहि । आत्मिक् नाट ओ भावना सड्ड भर पलिरहि । शरीर टे केवल डु रोजिक् पहुना जस्टे हो । जाट्टिक कना हो कलेसे इ दुनिया हमार सड्डक लाग नै हो । हमार शरिरके कथा सबके फरक बा टर जिन्गिक अन्त ओस्टेहे बा एक रोज जरम लेना एक रोज मुना । इ डुनियामे सक्कु चिज अस्टे बा एक रोज जलम लेहट एकरोज ओराजाइट । एक रोज फुलट एक रोज झरजाइट जाइट । कठैं इ सब बनैना वाला एकठो बा जे सारा डुनिया के ब्यवास्था मिलैले बा । उहे सबेके जिन्गिक कहानी लिखडेले बा ।
प्रेम टुहिन पटै टे बा जोन डग्गरमे मै नेंगनु उहे डग्गरमे टुँ फेन संगे रहो । हम्रे डुनुजे संगे पैला मे पैला मिलाके नेंगटहि टुहार बाट मै सुनटहुँ मोर बाट टुँ सुनटहो । टुँहार डु:ख मै हेरटहुँ मोर डु:ख टुँ । डुनुजे सान्तिके खोजिम रहि एकठो लावा जिवनके खोजिम रहि । लावा संसारके खोजिम रहि, ओ लावा जिन्गिक सुरवाट कर्ना हमार यात्रा रहे जोन यात्रा हम्रे सुरु कर्लि टर उ अचकच्रे रहगैल । अचानक पहिसे डुर होगैलो ।
अभिन फेन उ संगे नेगलक् डग्गर बिस्राइल नैहुँ । उ बर्खक् झरिमे भिजलक्, भुख्ले प्यासे नेग्लक् उ याद अभिनफेन ओस्टे ताजा बा । उ लडिया नहँगलक् व जरेहस लग्ना घामेम नेग्लक् अभिन सझ्ना बा । उहे करल बाचा अभिन फेन ताजा बा । हम्रे लावा जिवनके सुरुवाट कैलेरहि लावा सोच बनाके अपन जिन्गिहे लावा करैटि नेगल रहि । टर अचानक जिन्गिम भारि आँढि अाके टुहिन मिहि महा डुर डुर कराडेले बा । आप बाँकि बाट डोसर चिठ्ठी मे । मै टुहाँर माया ।
असिके मायाके पहिला चिठ्ठी अन्त हुइल रहिन ।
मायाके चिठ्ठी-२
मोर आत्मिय संघरिया मोर हृदयसे मैगर मैयाँ ओ सम्झना बा कना चहटुँ ।
प्रेम मै ढेर बाट पहिला चिठ्ठीम् लिख सेकल बटुँ टबफेन मनक् बाट कबुनै ओराई जहाँ सम जिन्गि रहि उहै सम् मनक् भिट्टरसे एक एक शब्द निकर्टि रहि । जाट्टिसे कहटुँ प्रेम इ डुनिया हमार घर नै हो ।
हाँ प्रेम मै यहाँक बाट का बटाउँ टुहिन पटै टे बा । सँसार सारा नास के हो इ सँसारके नाहि मै उ ठाउँक बाट कर्ना चहटुँ उहाँ जौन हमार दोस्रो जिवनके घर हो । टुहिन पटै टे बा डोस्रो जिवनके घरे ओ देशमे कौनो चिजके अभाव नैहो । जैना डग्गर फेन पटै बा प्रवेश कर्ना डुवार फेन पटैबा । हमार संगे नेंगलक् डग्गर फेन अभिन ओसहे लागट ।
हाँ प्रेम अभिनफेन हम्रे उ सृष्ति कर्ताके घर भेताई सेक्बि। ओ आनन्द मनाई सेक्बि ओ हम्रे अन्गिन्ती सुग्घुरसे महा सुग्घुर असलसे महा असल मित्र हुँकनसे आनन्दित जीवन बिताई सेक्बि । असिन जीवन कि कबु अन्त नैहुईना जीवन। हाँ प्रेम मोर आत्मीक भावना हेर्ती जैहो मोर सक्कु मनक बाट चिठ्ठिम पैने बटो ।
प्रेम मै बिस्वास करटुँ अवस्य मोर चिठ्ठिक् प्रतीक्षाम हुइबो । हाँ प्रेम मै अपन भावना आघे नमैनासे पहिले टुहार पठाइल चिठ्ठी उघारके हेर्नु । बहुत खुशी लागल बा महिन टुहाँर चिठ्ठी पहरके इ अपन मनम उकुस मुकुस हुईती रहल सँग्रल भावना इ चिठ्ठिम् लिखे पुगल बाटु । एकथो अनुरोध करतुँ प्रेम मोर भावनासे भरल चिठ्ठी मे कुछ मनडुखैना शब्द भेटाजैको टे माफ करहो । मोर नोनार फिक्कल भावना चिख्के बिचार कर्हो । यदि मिठ लागि कलेसे पोक्रि पारके ह्दयक् भौंकामे धैलेहो । मन नैपरि अथवा मिठ नैलागी कलेसे घुरौरामे फेकाडेहो । प्रेम हमार बाट मुख्य कर्के जीबनके बिषय लेके सुरु हुईल बा । जिन्गिक यात्रा से हमार चिठ्ठी सुरुहुइल हो, उहे जिन्गिक हरेक मोडके सु:ख डु:ख के बाट लेके मनक बाट सुनैना कर्ठि ।
मै टुहाँर चिठ्ठिक् एक एक पन्ना बिल्टैटि हेर्ने ओ पहर्ती गैनु । विशेष कैके जीवनके बाट लेके लिख्ले बटो । जीवनके परीभाषा ओ अपन शारिरीक् जीवनके टिट् मीठ् बट्कोहि लिख्ले बटो । जीवनहे अद्रिक अद्रिक बस्तुमे तुलना करल भेटैनु । कहुँ कलेबटो जीवन लदिया जस्तै हो,कहुँ कलेबटो जीवन फुला जस्तेै हो,कहुँ जीवन रुख्वक पतिया जसिन हो, कहुँ जीवन सु:ख दुःखके मिलन हो, कहुँ जीवन एक सँघर्ष हो । कहुँ जीवन एक सँघर्ष हो, कहुँ जीवन शिक्षा हो,कहुँ जीवन मिलन बिछोड् हो, कहुँ जीवन तराजुक पल्ला हो, कहुँ जीवन अनुभवके शास्त्र हो, कहुँ जीवन समयसे कर्ना सम्झौता हो, कहुँ जीवन प्रेम हो, कहुँ जीवन परिवर्तनशिल मार्ग हो, कहुँ जीवन बिहानिक शीत जसिन हो, कहुँ जीवन भगवानके डेहल मुल्यवान सुन्दर पहुँरा हो ।
हाँ जात्तीसे कनाहो कलेसे जीवन परमेश्वरके डेहल उपहार हो । मानवके शरिर परमेश्वर प्रथममे अपन हाँयसे बनैलै ओ परमेश्वर मानिनहे माटिक भुमिसे बनैलैं ओ जिवनके साँस फुकडेलै ओ मानै जिबित प्राणी हुइल ( उत्पत्ती २:७ बाईबल ) मे लिखल बा । परमप्रभु परमेश्वर मानवके शरिर अपन श्वरुपमे बनौेलै। ताकी सारा सृष्तीहेँ अपन अधिकारमे लेहे सेकिँत...। हाँ प्रेम मै टुहाँर मनक भावना टुहार चिठ्ठिम पहर्नु बहुट मजा लागल मै टुहाँर एक एक चिठ्ठि पहर्टि गेेनु आज उहे बाट से मोर मन जिट सेकल बटो । लिख्ना मन बहुट बा टर डोसर चिठ्ठिम लिखम् कटि बिडा चाहटुँ । मै टुहाँर माया ।
0 टिप्पणियाँ