टुहाँर याद आइट भाग-१ || Tuhar Yad Aait Part-1 || भैइगैल भुवर बिहान

 टुहाँर याद आइट

सुन्दर गाउँ चारुओर हरियर बनुवा एक पाँजर परवटुवा उहे परबटुवक् उप्परओर बरे सुहावन बद्रि बिल्गाइट् । बद्रिक कोनिकप्चा ओरसे ठोर ठोर ओजरार केरनि छिरट् डेखाइट् । 

गाउँ बरे सुहाउन बिल्गाइट् घर फेन काइल लाल उज्जर टमाम मेरिक बिल्गाइट् । उहे गाउँक् गल्लिम एक बगाल नाच करुइया बिल्गैठैं । लहँगा फरियम नचुन्या संगे मडरिया सक्कुजे नाच करटि नेगल रठैं । कोइ लहँगा घल्ले रहट् टे कोइ उज्जर गोन्या चौबन्डि कुर्टा चोलिया म घेचम सुत्या माला गुरिया घालल् बरे सुहाउनसे नाच कर्ठैं । 

मै उहे गाउँक डम्मरुवामे बैठल उ नाच हेर्टि रहुँ । उहे बेला उ बठिन्या अइलिन ओ मोर कु्म्हा परकरके मोर पंजरे बैठलिन ओ मोर आँखिम आँख मिलाके एक घचिक बरे घनसे से हेर्लिन । मै फेन हेर्टिक हेर्टि रहगैनु । महि अचम लागटहे आज कहाँ इ आगैलिन कहिके । मै हुकि कनु का बाट बा आजटे बरे चुप्पेसे अइना । उ कलिन का हेरटो नाचट, चलो मै नाचम टुँ मन्डरा बजै हो । मै कनु गफ ना मारो कबुनै नच्ना मनै टुँ नच्बो कहिके हुँकार मजाक उरैनु । टर उ महि टानके लैगिलिन ओ मोर पुट्ठम मन्डरा कसडेलिन । अप्नेजुन लहंगा फरिया घालके आगैलिन । 

हमार डुनु जहनके नाच बरे जोर जमल रहे । बरे मजा लागटहे उ मघौटा नाचेम हुँकिनसे नाचट् । सारा गाउँक मनैनके बगालेम मै खोब उलर उलर मन्डरा बजाउँ लहँगा फरिया उरैटि नाचटहिन । उहे नचेम हमार डुनुहजनके मैयाँ साँटिक साँटा हुइलस । नाचक पाछे चुक्कि खैना बेलाफेन आगैल रहे हमार मैयाँ आउर गाहार हुइटि जाइटहे । हमार जिन्गि एक डोसरके मैयम जिएलागल रहि । 

असटके हुकार बाबा हमार घर आके ठकौनि खेन खाडर्लिन । आपटे आउर मजा होगैल हमार, ठकौनि पाछे टे पक्कापुरी होजाइट । आढा जन्नि बनजैठैं कहिके मै हुँकिनसे आउर घनके भेंट करे लग्नु । हमार भोजक रोज आगैल मै डुल्हा उ डुल्हि बन्ना बेला आसेकल रहे । मै डोलम बैठना उ डिलिम बैठ्ना बेला आगैल रहे । बरे खुशि लागै आपटे हम्रे थरुवा जन्नि बनजाब कहिके । भोजक रोज आइल घरेम ढुमढामसे भोजक सामा होगैलरहे । बराट जैना सुरसर हुइल महि डोलम उठाके बोक्के लैजाइ भिरल रहिंट डुल्हिक घर । बरे खुशि रहुँ मै ठिक्के आढा डग्गर पुगल पुगल रहि चराक से डोला बोक्ना बाँस टुट्के मै टरे गिरनु । बरे जोर झस्कनु मैटे अपन कोन्टिम रहुँ । एक ओर खटियक पाटि टुटके मै भुँइयामे परल रहुँ । डिन ऊठके मोका ओरसे घाम लाग्गैल रहे । जग्नुटे अकेलि उहे टुटल खटियामे परल रहुँ । सपना फेन अट्रा मजा रहट कहुँ सोच्नु । कुछ डिन पाछे टे बठिन्या उरहर्के गैगिलिन मोर सपना कहानी सपनामे रहगैल । 

[आज फेन याद आइट उहे सपना के । आज मोर सम्झनाके पात्र इ गित बने पुगल बा । ]

बाट हो भैइगैल भुवर बिहान मघौटा नाचक् भिडयो के । इ भिडियो मा ढिकरि बनाइक लाग चौरक् पिठा सानट् पारट् ओ उहजैना टरिका बरे मजासे हेरे मिलट् । बहुट जहन पटा नै रठिन थारुनके खानपिन बनैना टरिका इ भिडयो मे ढिकरि उहजैना पैन पानी ढिकैना बट्ला आगि सुगैना चुल्हा से लेके बान्सा कारना भिट्टर कोन्टिम बेल्सना डोक्नि मसला ढरना छिट्वा ढकिया चट्नि टिना खैना डोनिक झिंरा हेरे मिलट् ।

गोंडरि बिछाइल रहट् एक ओर नाच करठैं टे कोइ डोस्टि डोनियामे जाँर सुर्कठैं ओ सुरिक सिकार ढिकरिखैठैं । इ भिडियो म रुपया लुटाइट् फेन हेरे मिलट् । मैयाँ पिरेम से बाझल इ भिडियो मे अपन मनै से सिँगार लेहगा चोलिया गोनिया टिकुलि चुरिया कजरा जसिन चिज बजारसे लानडेहो  कना बाट बेल्सल पाजाइट । इ भिडयो मे मघौटा नाच कर्ना टरिका ओ बिडालेहट समके सक्कु चिज हेरे ओ सुने मिलट् । 

टुहाँर याद आइट भाग-१

ओराइल।