जिन्गिक ओजरिया डिया || Jengek Ojariya Diya

थारु अनलाइन रेडियो सुन्नुहोस 👈️ 

कुछ बरस पहिले डिया हरेक घरेम नैहोके नै बन्ना रहे । जसिक हुइलेसे फेन ओजरार कराइक लाग कुछ उपाइ लगैहि पर्ना । बेरि खाइबर ओ राटके नेगेबर ओ राटिक काम करेबर एकठो डिया चाहे । 

डिया एकठो पहुँरा डेना चिज फेन बनल रहे उबेला । डिया एकठो काँचक, माटिक, तामक, काँसक चिजके डेखेमिले । अस्टके ओजरार करैना जोजा फेन डेखेमिले लट्ठिमे चिरकुट बहानके टेलेम भिजाके बरैना ओ सररिक कच्छे लट्ठिक, काठिक फेन जोँजा डेखे मिले ।  असहेके लालटिन ओ गैंस फेन खोबसे डेखे मिले । 

अपन समयमे डिया ढेर जहन अोजरार जिन्गि डेखैले बा । अाज ओहे डियक उ भुमिकासे मनै हम्रे पुर्खनसे ज्ञानगुनके बाट सिखे पाइटि । उहे डिएक साहारासे पहरलै, काम सिख्लै, भारि भारि काममे सफल हुइलैं । घरगोस्या अनगुट्टि उठके अपन ठन डिया बारके लसरि बिन्ना, सुप्पा, छिट्वा, डिल्या, खैंचा,खटोलि, मच्या खटिया बिन्ना करिंट । 

घर गोसिन्या भिनसरहि उठके डिया बारके सुख्वाइल सुक्खुन ढेकिम कुट्ना, चकियम् उरडक् डाल, मसरिक डाल डरे बार फेन उहे डियक ओजरार मे करट डरख परे । अंढरहिं उहे डिया हाँठेम बोक्के घर बहरना, अंढरहि डिया लेके कुँवामे पानी भरे जाइट डेखजाए । डिया लेके घारिम, बग्गरमे गोरु बछरु बाँढे जाइट डेखजाए । 

रातके पहर्ना बेला फेन पह्रुइया सक्कुजे अपन अपन घरेसे डिया लेले जैना अो अपन अपन डियक ओजरारले पहर्ना लिख्ना करट डेखजाए । उहे डियक ओजरारमे पहरके मनै भारि ज्ञानगुनके बाट सिख्लै ओ सिखैलै फेन । 

आज आके उ डियाहे सम्झुइया कमे हुँहि । ढेरजे टे उ डिया हे बेचडारल हुँहि । अपन जिन्गिक् भबिस्य डेखुइया डियाके कोइ भेलो नै कैके डेहरिक गोराटिर खुसर्ले हुँहि । उहे डियक साहारासे जिन्गि गुजर्ना, ज्ञानगुन सिख्के आज हम्रहिन ओजरार डग्गर डेखुइया पुर्खा ओइनके फेन अस्टे हालट टे बटिन? जे भुख्ले प्यासे रहिके फेन अपन लावा पुस्टनके भविस्य हेर्के सोचके रातबिरात उठके खेति कर्लै, सम्पति जोर्लैं मजा ठाउँ ओर बसाइ सराइ कर्लैं ओ अपन सन्तान ओइनहे बह्रैलै, पौंह्रैलै ओजरार डग्गर डेखैलैं । रात्ति उठके कुट्ना पिस्ना ओ सारा परयार हे मिठ खओइना घरगोसिन्यक् जिम्मेवारी रहिन । उ पुर्खा ओइनहे का आबक पुस्टा उहे डिया ओहटाइ हस ओहटैले टे ना बटि? कोइ कलेबा अपन जिन्गि बनैना मनै हे कबुना बिस्रैहो । 

डिया हमार जिन्गिक ओजरिया हो । मोर बिचारले डिया डु मेरिक बा एकठो आत्मिक ओजरार करैना डोसर सरिरके ओजरारके लाग । अात्मिक ओजरार कराइकलाग ज्ञानगुन शिक्षाके जरुरट परट कलेसे शरिरके लाग आगि कि बिजलि के जरुरट परट । 

डिन समय अनसार ओजरार करैना साढनफेन लावा मेरिक बन्टि बा । इहे लावा आधुनिक जमानामे हम्रे अपन जिन्गिक डग्गर डेखुइया डिया हे बिस्रा टे ना गैलि? हमार उ संसारके सबसे सुन्दर पहिरन बिस्रा टे ना गैलि? हमार उ सुन्टिकिल जिउ कुबुलैना मंन्डरा, मजिरा, झाल, कस्टर बिस्रा टे ना गैलि? हमार उ सुन्टि सुहावन मिठास भासा बिस्रा टे ना गैलि? हमार उ मजोरक पख्नाले लिखल गित बर्किमार, मागर, ढमार, सजना, मैना बिस्रा टे ना गैलि? कहाँ बाटे उ हयार डिया जोन चिरैं बनाइल । हाँथि, मजोर बनाइल रहिंट ।   कहाँ गैल उ डिया जोन डियक साहारासे जिन्गिक कहानि सुरुइल रहे । आज मोर खोजि इहे बा । 

- संगम चौधरी 

थारु अनलाइन रेडियो सुन्नुहोस 👈️