पहिला मायाके चिठ्ठि || हुँकार सम्झनम्

 पहिला मायाके चिठ्ठि , हुँकार सम्झनम् 

एकठो गाउँमे माया नाउक मनैया रहिन । हुँकार नाउँ जस्टे माया रहिन काम फेन ओस्टेहे रहिंन । गाउँमे हुँकार छोटमोट मिझ्नि पसल फेन रहिन । चिया से लेके नास्टा खैना मनै उ पसल मे अइना करिंट । माया के बोली बरे मिठास रहिन । बहुट मनै ओकर पसलमे हुँकार गफ ओनाइ अइना ओ रमैना किरीट । 

एकठो हुँकार संघरिया रहिस बरे मन मिल्ना एक डोसरहे बहुट मानिट एक्के संग खैना सुट्ना खेल्ना रमाके ओइनके डिन बिटिन तर समयके खेल डुनुजे बहुट डुर डुर होजैठैं । भेंट घांट कम हुइलग्ठिन एक डोसरसे बाटचिट कम हुइलग्लिन । आप बाट कर्ना एकठो किल माध्यम रहिन चिठ्ठी । हाँ उहे चिठ्ठीक साहारासे उ डुनुजे बाट करठैं । माया चिठ्ठीक् ओंरी असिक् टरठिन् । 

संघरिया आप टे हम्रे बरे डुर डुर होगैलि । टुँ कहाँ मै कहाँ डेख्लक् ढेरडिन होगैल बा । टबुपर मै चाहटु टुँ मजै हुइबो । 

संघरिया टुँ जहाँ रलरसे फेन मै टुहाँर मायामे बचल बटुँ । ओ मै टुहिन मनक बाट इ कलम ओ कागजके साहारालके सुनेना चाहल बटुँ साइड मोर चिठ्ठी टुँहार ठन जरुर पुगि ओ स्विकार कर्बो । 

संघरिया मै जहाँ रलसेफेन मोर मनक भावना हरडम टुहाँर समुरहि जब मोर याद संटाइ लागि कलेसे मोर चिठ्ठी हेरलेहो । टुहिन पटाबा हमार आत्मिक सम्बन्ध कत्रा बलगरबा । टबे मारे इहे संम्बन्धमे आउर बल्गर गाँठ पर्ना चाहल बाटुँ । संघरिया शरीर से हम्रे लग्गे रहि टर अब्बा सरिरसे डुर बटि ।सरिरेके रेखडेखके लाग असिके डुर हुइपुगल बटि । उहेटे कठु शरीर टे कुछ समयके लाग बा हम्रहिन बहुट कुछ करेपर्ना कर लगाइ जेकर कारन हमार सम्बन्ध सराइ पुगट । शरिर हमन धोखा डेलेसेफेन आत्मासे कबु डुर नै होप । महि यादबा टुहार मनक भावना ओहे मारे हमार सम्बन्ध कोइ छुटाइनै नै सेकि । 

संघरिया हम्रे आत्मासे बहुट लग्गे बटि । शरीर हेरके किल मनक सक्कु बाट बुझे नै सेकजाइट । मनक बाट झुझकलाग टे मनक बाट सुने परट मै फेन टुहार मनक बाट बुझन्नु टुहार मनक बाट ओ मोर मनक बाट एक्के बा । सरिरके के बाट करु आज बा काल नै रहेसेकट । इ टे डु डिनके फुला जस्टे हो । ओहे टे कठुँ " शरीर हे मैयाँ ना करहो इ टे कुछ डिनके हो । माटिक बनल शरिर हो, एकठो आँखिक सोभा किल हो । आत्मिक भावनाहे मैयाँ करि, इ नाट अमर रहि । आत्मिक नाट ओ भावना सड्ड भर पलिरहि । शरीर टे केवल डु रोजिक पहुना जस्टे हो । जाट्टि कना हो कलेसे इ दुनिया हमार  सड्डक लाग नै हो । हमार शरिरके कथा सबके फरक बा टर जिन्गिक अन्त ओस्टेहे बा एक रोज जरम लेना एक रोम मुना । इ डुनियामे सक्कु चिज अस्टे बा एक रोज जलम लेहट एकरोज ओराजाइट । एक रोज फुलट एक रोज झरजाइट जाइट । कठैं इ सब बनैना वाला एकठो बा जे सारा डुनिया के नियम बनाडेहल बा । उहे सबेके जिन्गिक कहानी लिखडेले बा । 

संघरिया टुहि पटै टे बा जोन डग्गरमे मै नेंगनु उहे डग्गरमे टुँ फेन संगे रहो । हम्रे डुनुजे संगे पैलामे पैला मिलाके नेंगटहि टुहार बाट मै सुनटहुँ मोर बाट टुँ सुनटहो । टुँहार डुख मै हेरटहुँ मोर डुख टुँ । डुनुजे सान्तिके खोजिम रहि एकठो लावा जिवनके खोजिम रहि । लावा संसारके खोजिम रहि ओ लावा जिन्गिक सुरवाट कर्ना हमार यात्रा रहे जोन हम्रे सुरु फेन कैलि । 

अभिन फेन उ संगे नेगलक् डग्गर बिस्राइल नैहुँ । उ बर्खक् झरिमे भिजलक्, भुख्ले प्यासे नेग्लक् उ याद अभिनफेन ओस्टे ताजा बा । उ लडिया नहँगलक् व जरेहस लग्ना घामेम नेग्लक् अभिन सझ्ना बा । उहे करल बाचा अभिन फेन ताजा बा ।  हम्रे लावा जिवनके सुरुवाट कैलेरहि लावा सोच बनाके अपन जिन्गिहे लावा करैटि नेगल रहि । टर अचानक जिन्गिम भारि आँढि अाके टुहिन मिहि महा डुर डुर कराडेले बा । आप बाँकि बाट डोसर चिठ्ठी मे ।  - माया