चिट्ठी हुँकार सम्झनम

बाट उ बेलाक हो संघर्यासे एकठो लावा संघर्यक जलम दिन मे गैल रहि । कार्यक्रम सोचल से ज्याडा मजा हुइलस नाच गान बुहुट हुइलस अपरिचिट मनैन से परिचय फेन करे मिलल् । 

अस्टे करम मे मै एक लावा मनै महिसे परिचय करे पुग्लाँ । उ मोर लाग लावा रहिट लावा अनुहार से मै परिचय करे पुग्नु । उ रोज मजा खानपिन हुइलस हम्रे संगे खैलिपिलि ओ संगे रमैलि, उ एक रोज के कार्यक्रम हमार लाग बहुट छोट होगैल । उ छोट समय मे हमार गहिंर मैयाँ बाझगैल रहे । उ कहे लग्लै जानू महि टुहिन से प्यार होगैल, उ मोर मनके बाट बोल्ले रहिंट उ बाट से महि हाँसि लागल काहेकि मै फेन हुँकिन मन पराइ लागल रहुँ । 

उ राट हमार संगे बिटल मने बाँकि समय अकेलि कटैना बरा मुस्किल होगैल । केवल हुकारे यादमे दिन राट कटे लागल । सपना मे हुकिन से बिटेलागल कब भेट करु कहाँ भेटु हुइलागल । जबसे हुकिन डेख्नु उहे रोज से हुकार चेहरा मोर आखिँम छप गैल, हुँकार मिठ बोली मोर कानेम गुन्जे लागल केवल हुकार अवाज सुन्नास लागे । जब फोनमे हमार बाट होए असिन लागे चौबिसो घण्टा बाट कर्टि रहुँ । उ फेन महि से इहे बाट करिट जोन महिसे होए । डुनु जहन के हाल एक्के रहे । हम्रहिन एकठो रोग पकर लेहल रहे इ रोग छुटैना बरा मुस्किल होगैल रहे । 

जब भेट होए डेख्के साँस रुक जाए डिलके ढड्कन जोर से चले लागे हम्रे एक डोसरके ज्यान बनगैल रहि । घुमे गैल मे सारा डग्गर रमैटि नेंगि , भिडियो फोटु खिचैटि डेख्ना मनै फेन डिवाना होजाइट । एक रोज मिलन फेन बिछोड, कबु सपना मे कबु बिपना मे हमार समय चल्टि रहल । बाबा डाइ महि बहुट सम्झैलै टर मै अपन ढुन मे रहुँ, महि पटा नै नै रहे जाने कब प्यारके ढागा टुटजाइ अचानक एक रोज हुँकिन ओरे जहन से रमाइट डेख्नु । जब मोर आखिंक लजर उहाँ परल उहे बेला मोर मन झराक् से करल सारा मनक सापना बिछ्ना गैल, सोचले रहुँ उ महि किलब माया डेठै टर डोसर से रमाइट डेख्के सपनक महल भसक गैल । आप महि उ मनैया हे भोजहा शुभ कामना डेना बाहेक कुछनै रहगिल हो । 

पाठक मित्र इ भावनाके लेखक अपन नाउ ठेगान नै चहलै । इ भावनासे इहे बुझना बा कि डाइ बाबाके बाट नै मन्बो टे डुख मिलट । डाइ बाबा के सामु लज्जिट होके रहे पर्ना ओ समाजके लजरमे गिरके रहेपर्ना हुइट ।      ..✍️