बेहडा बाबा मेला || Behada baba mela

 

एक समयके वाट हो हम्रे बेहडा बाबा मेला हेरे जाइटहि । डु जे रहि मै ओ संघरिया से । साइकिल के यात्रा रहे घाम फेन रहे मने हावा चलटहे रहरके मारे हम्रहिन घाम कना बिसर गैल रहि । डुनुजे बाट कर्टि जाइटहि मेला कसिन हुइ काका किनब ओ बहला खेल्ना अस्टे अस्टे बाट चलटहे हमार । 

हावा जोर से चल्लक मारे चुन्नि उरके चैनमे लटपटागैल   । अत्रा जोरसे लटपटागैल कि चक्का आघे ना पाछे हुइ लागल । डुनु जे पस्ना पसिन होगैली एक घचिक पाछे एकठो वाइक मे डुजे अइलाँ हम्रे ओइनहे सहयोग के लाग रोकैलि ओइने रुकलै ओ लटपटाइ मोर चुन्नि बलजब्रि निकारडेलैं चुन्नि जम्मह भोंग किल करिया होगैल । मेला हेरे जैना मने मरगैल मोर निक्रल मनै जसिक फेन जाइपरल कहेलग्लै संगे रहुइया । 

ओरे गुलरा नै रलक मारे पसल मनसे साबुन लान्के ढोके जाइपरल । उ डुजे हमार लाग अन्जान मनै रहिंट  पहिल चो भेंट हुइल रहे हमार । उहे बेला हम्रे चिन्हापर्चि कर्लि कुछ डुर सम् संगे बाट कर्टि गैलि तर ओइने बाइक मे ओ हम्रे साइकिलमे रकलमारे मेला सम् हम्रे संगे जाइ नै सेक्लि । ओइने डग्रेम अस्रा हेरब कहिके चलगैलै हम्रे ढिरे ढिरे साइकिल चलैटि गलि । मेला पुगे बेला डग्रेम हमार अस्रा हेरटहिट उहाँसे फेनसे संगे गैलि । अन्जान मनैनके सक्कु चिज मजा लागट सुनले रहु उहे रोज पटापैनु फुह्रन्ने महि हुँकार सबकुछ मजा लागे बोलाइ, हँसाइ, हेराइ, नेगाइ ओ उ मुक्कुरैना  चोंगि । मेला हम्रे संगे खेल्लि हुकार लेडेहेल लहँगा चोलिया पैचुरि झिल्मिल्या चुरिया घालके मेला खेल्लक याड हेराइल नै हो ना उ रोजक मैयाँ छुटलहो ।

 

हमार मिलन मोर ओह्रल चुन्नि करैलस सयड उ रोज साइकिलिम चुन्नि नै फंसट कलेसे कलसे हुकिनसे भेंट नै हुइने रहे । हमार प्यारके शिलशिला चल्टिगैल बहुट कुछ जिवनमे हुइलस सु:ख-दु:ख हँस्ना- रोइना चल्टि गैल । मै हुँकार खेले पुगजाउँ टे उ हमार घर असिन लागे आप हम्रे जिन्गि भर अस्टक संगे एक डोसर हे साथ डिटिरहब । एक बरस डु बरस कर्टि टिन बरस गुजर गैन उहे टिसरा बरमे मे समय करोट लैलेलस् । उ हे संगे हुँकार मनक पन्ना पलट गैलिन किस्मट के कहानि फरक लिखे लग्लै मोर कहानि फरक ओ अपन कहानि कहानि फरक बनाइ लग्लै । जब उ अपन डिल मे मोर नाउ मेटाके डोसरके नाउ लिख्लै कहानि कन्टि फेंका लेलस मै पटा पैनु कि उ महि ओहटा के औरे जहन अगोर रख्लै ।

मोर आघे नाहि पाछे ओर डौरे लागल घनु घनु उहे बिटल खिस्सा मनेम डौरे लागल । उहे रोज जोन हमार पहिला भेंट हुइल रहे उहे पल जोन मेलम रमैलक ओ हुकार लेडेलक लहंगा चोलिया चुरिया ओ पैचुरिक छन्कार । मै मरु टे कसिक जिउँ टे कसिक होगैल उ पल हे बिस्राउँ टे कसिक बिस्राइ खोज्बो उहे हावा आके सम्झा डेहट उहे मेला आइट फेन सम्झा डेहट, पैचुरिक छन्कार मोर मनहे झस्काइट । जब जब लहंगा चोलिया चुरिया आंगेम घल्ठु हुँकारे सम्झना आजाइठ् । ना मेे हुँकिन बिस्राइ सेकल हुँ ना हुकिन बुझे सेकल हुँ आप टे महि इ प्रकिटि से फेन नुक्के रनास लागट तर डोस ओरे जहन डेखैना मोर जिन्गिक कहानी टे मोरे हाँठेम हरे अपन कहानी अप्नेहे लिखे परट कठैं अपन भाग्यहे का डोस लगैना अपन नेंङ्ना डग्गर अप्नेहे बनाइ परट कठैं औरेक अस्रम का लागल रना । मोर बरे ढिला होकल रहे महि बरे गहिंरके हठ्लाइ पर्ना होगैल रहे । आप मै अपन मनमे ओजराइ भविश्यके डग्गर रोजके फेनसे जिन्गिक लावा कहानि लिख्ना सुरु करसेकल बटुँ । ओराइल ।

 

आसा ....✍️