सुर्खेटके जिन्गि

कहाँसे सुरुकरु अपन मनक बाट सम्झलसे आभिन फेन आँस बहके गाल पुजाइट । बाट बरस सुर्खेत ओरिक हो । 

मोर भोज हुइना बेला महिन मोर डाइक कलक बाट याड आइल, मोर डाइ बाबासे अन्टिम बिन्टि करके कहल रहे कि छाइनके भोज मजासे करहो। मोर बाबा डाइक बिन्टिसे मोर भोज बहुट मजासे करल । मोर भोज मजासे हुइल । मै अपन गोसियाके संग एकठो गोसिनियाके भुमिका निभाइ लग्नु । समय बिट्टि गैल ।कुछ बरस बाड हमार मैयाँके पहिल उपहार एकठो छाइ डेलैं । 

आप मै एकठो डाइ बनगैल बटुँ ।जब मै बच्चाहे अपन डुढ चुसाइ लग्नु उ बेला महि अपन डाइक याड आइल ।जोन डाइ महि अस्टक अपन डुढ चुसाके हुर्काइल । उ डाइ आझ यि संसारमे नैहो महि डाइक खोब डाइके याड आइ लागल । डाइ महि कसिक नौनौ महिना सम अपन कोखमे लेके नेगल हुइ । उ डिन महि पटा चलल जब छाइ मोर पेटमे रह । 

मोर डाइ मोर लाग कट्रा डुख खाँडल हुइ । मोर जिउ बचाइक लाग कट्रा रुइल हुइ । मोर डाइ महि अपन डँडुर कोनामे सुटाके महि डँडुर कराइट रहलहुइ । मै जन्ना बुझ्ना हुइट् सम डाइ बाबा मोर जिबनमे कौनो चिजके कमि नैकरैलैं । मै लगायट चारजे हमे्र लर्का ओ डाइ बाबा सहिट छ जहनके परिवार सुख शान्तिमे चल्टि रहे । हम्रे पुर्खाके अनुसार हिन्डु रिटिरिवाजमे रमइटि रहि । खाइटहि पियटहि । मजा परिवार रहे । हमार डिन बिट्टि गैल । हमार घरके काकी रहि उ कहाँसे खिरिष्टियन होगैल रहि ।

काकी कब विस्वास कर्लि काकरे विस्वास कर्लि महि कुछ पटा नैरहे । मै सोचुँ काकरे अपन पुर्खासे चलल चलनहे छोर्के यशुमे जैठैँ । मै खिरिष्टियन विस्वासहे घृणा करुँ । महि हिन्डु परमपरा मजा लागे । डिन बिटटि गैल । अचानक एकडिनके बाट हो मोर भैया बिमार परल । भैयाहे बचाइकलाग हम्रे हिन्डु परमपरा अनुसार आछट, पाटि, गुरै, पुजापाट सब कराडर्लि । अस्पटालफें कराडर्लि मने कुछ पटा नैचलल । 

आप भैयाहे बचाइकलाग एकठो किल उपाइ रहे । यशुके चरणमे जैना । पास्टर बुवा हुँक्रे सुनैले रहिँट कि बिमारि मजा हुइट कैह्के । यिहे विस्वाससे मोर डाइ बाबा येशुके चरणमे गैलैं । हम्रे विस्वास कर्लि ओ भइया ढिरेढिरे मजा हुइ लागल । जिन्गिमे एकठो डुख मेटल मने औरे डुख ठपगैल । भैया मजा हुइटिकिल डाइहे डुस्ट आत्मा आक्रमण करडारल । 

यी बाट २०६५ सालके हो । जौन डिन डिडि ओ मै पास हुइलक बाट से खुसिसे गडगड रहि मने उहे डिन डाइके डुखके डिन सुरु होगैलिस । मोर डाइ हमार पर्हाइमे बहुट ख्याल करे । समयके खेल कना होकि अपन भाग्य कना हो क्यामपस जैना सुरु हुइटि किल डाइहे बेमार सटाइ लग्लिस । एकओर क्यामपस पर्हे पाइलमे खुसि रहे मने एकओर डाइक डुख डेखके बहुट डुख लागे । डाइक उपचार कर्ना जारि रहे ओ हमार पर्हाइ फेन चल्टि रहल । बाट २०६५ सालके हो । बाबा डाइहे कोहलपुर मेडिकल कलेजमे लेके गैल । वहाँ हरेक रोगके चेकजाँचके पाछे अन्टमे डाइकमे क्यान्सर डेखा पर्लिस ।

यी बाट सुनके सारा परिवारमे सोक छागैल । सबके मनमे बस एकठो प्रस्न खडा होगैल । आप डाइक का हुइहिस ? डाइके उपचार कर्ना ढेर पैसा लग्ना हुइलिस । टबफेन बाँचट कि नै कौनो पटा नैरहे । बाबाहे मनै सल्लाह फेन डेलैं । जमिन बेँचके उपचार कराउ कैह्के । मने हमार बाबाके मनमे डाइ नैबाँचि कना जनासेकल रहिस । बाबाके कहाइ इहे रहिस जैना मनैयाँ टे चल जैहि मने बाँचल मनैनके हालट का हुइ । बाबा अपन लर्कनके मुह हेरके जग्गा बेंचना मन नैकरल । डाइके उपचार कराइ नैसेक्लेसे फेन डाइहे हमार मैयाँके बहुट खाँचो रहिस । डाइक डुख डेखके महि पर्हना मन फेन नैलागे । 

जब डाइ छटपटाइ लागे टे मै डाइके डुख डेखके बहुट रोउँ । इह डुखके उप्पर डाइहे हेरे अइना मनै आउर मन डुखैना बाट करिंट । मने कोइकोइ सान्त्वना डिइँट् । चिन्ता नाकरहो मजा होजैहि कहिंट । मनै ज्या जसिन कलेसे फेन अपन जन्म डेना डाइक डुख डेखके किहिन मजा लागि । कबुकाल्ह टे डाइक डुख डेखके अइसिन लागे डाइक ठाउँमे मै रटुँटे कानै । मै डुख पैलेसे फेन मोर डाइ आरामके जिन्गि जिनेरहे । मने का कर्ना हो साइड परमेश्वरके इच्छा ओस्टे रहल हुइहिन । मोर डाइ आँखिमसे आँसके बुँडा गिरैटि कहे, मन्जु मै मुजिम टे टुर्हे डुख पैबो टुहिनके बाबा औरे डाइ लनहि । छाइ मन्जु मोर स्याहार सुसार करट करट टोर पर्हाइ फेन बिग्रटा । मै टे डुखि बटुँ बटुँ मने टुहरिन फेन डुख डेहटुँ । महिहे बिस डेउ ओ खाके मरजिम नैटे मोर घेंचामे लसरि बान्ढके झुलाडेउ मै मुजैम कैह्के मोर डाइ हम्रिहिन कहे । 

महिहे यी बाट सुनके बहुट डुख लागे । कैसिक अपन डाइहे बिस डेके मुवाइ सेकजाइ । कैसिके अपन डाइक घेंचामे लसरि बान्ढके झुलाइ सेकजाइ । मै डाइक अइसिन बाट सुनके रोइ लागु । मोर मनमे बहुट भारि ढुंगा झटके हस लागे । मै मनमे साेंचे लागु । यदि डाइक कुछ होजैहिस कलेसे मोर जिबनमे का हुइ, कैसिक जिए सेकम मै ।

आझ सम मोर डाइ मोर जिवनमे कौनो चिजके कमि हुइ नैडेहल मनेर पाछे मोर जिबनके हालट का हुइ कैह्के मै बहुट गहिरसे सोंचुँ । करिब करिब छ महिना सम राट दिन डाइक सेवाम समय बिटैनु । परीक्षा अइना कुछ दिन किल रहिगैल रहे । महि नाटे पर्हे मिले ना सुटे, अस्टके मोर डाइक अन्टिम अबस्था आगैल रहिस । 

मोर डाइ, बाबाहे कहे पर्ना अन्टिम बाट असिन रहिस ‘भोज लेहे नाछोरहो, छाइनके भोज मजासे करहो, यदि टुँ भोज कर्बो कलेसे महिसे मजा भोज कर्हो, छुट्की छावाहे जत्रा सेक्बो पर्हैना प्रयास करहो । यिह बाट कहटि मोर डाइ सक्कु जहन छोरक यी संसारसे बिडा लेक गैगैल । यी संसारसे बिडा लेक घर गैगिल मोर डाइ । आझफें डाइ कना सब्ड सुन्ठुँ कलेसे ओहे मोर डाइक याड खोब आइ लागठ । ओराइल ।

मन्जु चौधरी....✍️